بیر اوتوزموش پاشانین بوش قالاسین گؤر منی گؤر
یوواسیندان ییخیلان قوش بالاسین گؤر منی گؤر

ایلین آخیر گئجه سینده آتاسیز بیر اوشاغین
اوتانیب اللری بوم بوش آناسین گؤر منی گؤر

منی دیندیرمه دانیشسام سنی پئشمان ائده رم
دینامیت بومباسینین پاتلاماسین گؤر منی گؤر

باجاغیندان آسیلان داردا جلالتلی شئرین
داملا داملا قانینین داملاماسین گؤر‌ منی گؤر

منه سندن سورا دونیادا غمین نئیله یه جک
سؤز یازاندا قلمین آغلاماسین گؤر منی گؤر

یومورام سندن اؤتور گؤزلریمی آرزولارا
سارانین سئللره بئل باغلاماسین گؤر منی گؤر


رحیم اصغرزاده تکین

پنجشنبه 1401.1.25
بؤلوملر : تورکی شعرلر ,