بیر طوی مجلیسینه آشیق شمشیر ،آشیق کیمی دعوت آلیر.یولون اوزاغ اولدوغو سببدن ، آشیق بئله قرارا گلیر کی بو مسافه نی قاطار لا  گئدسین.او سببدن ده قاطار بیلیتی ساتیلان مکانا مراجعت ائتدیک ده قاطار بیلیتینی طلب ائدیر.سن دئمه بیلیت ساتان بیر جاوان قیز دیر کی آشیق شمشیرین شعرلریله تانیشدی ، و آشیقین حاقیندا چوخ اوخویوب و ائشیدیب آما آشیقی گؤرمه میشدی. آشیق یاخینلاشیر و گئتدیی مقصده بیلیت طلب ائدیر.قیز باشینی قوؤزامادان سوروشور آدینیز?آشیق دییر آشیق شمشیر.قیز شمشیر آدینی ائشیدرکن باشینی قالخیزیب آشیقا باخیر و گولومسه ییر ، و دئییر عمی!سن آشیق شمشیر سن?من بئله بیلیردیم آشیق شمشیر جاواندی، سن کی بو قده ر قوجاسان!!آشیق هئچ نه دئمه دن قلم الینه آلیب و بئله یازیر:

 

بیر ده گول

 

جاوانین گولمه سی قوجایا خوشدور

گول آی قیزیم من قوجایا بیر ده  گول

خط آغاریب دیش تؤکولوب اوز باتیب

گولونج ائدیب او خدایا ،بیر ده گول

 

الیمدن چیخیبدی جاوانلیق دمی

قوجالیق داغلاییب بوتون سینه می

قویمور دوز دانیشام، اییب چنه می

سالیب منی نه های هایا بیر ده گول

 

بیر واخت جاوان ایدیم منده سیزین تک

دئییردیم آچیلیب چمن گول چیچک

سئومزدیم چیرکینی گزردیم ملک

اعتبارسیز بو دونیایا بیر ده گول

 

منیم له غملره یاری اولارسیز

گؤزللیگین انتظاری اولارسیز

سیزده بیر گون قوجا قاری اولارسیز

بوگردیشه، بو فنایا بیر ده  گول

 

دوشگونه لازیمدیر وئره سن قویماق

سحری قایقاناق، آخشام بال ،قایماق

شیرین جمالیندان اولارمی دویماق

ائتدیگیم بو تمنایا بیر ده  گول

 

عشق اوجوندان اودا یاندی پروانام

زحمت دن قاچمیرام مرد دوغوب آنام

دئییردیم اوو آلان قوجا ترلانام

شمشیرکیمی قارچیقایا  بیر ده  گول.

یکشنبه 29 اسفند 1395
بؤلوملر : آشیق و آشیقلار,